صح ولا مش صح؟

"لاقيتك والدنيا ليل قلتيلي مخطوية ... ياليل ما بعده ليل يا ناعس بهدوبي " البيت دا كان بيهاجم رأسي وانا اعدة علي الدكه قصاد شقتي باكل بطاطس وسندوتش زينجر ... كل الناس بتحب الشوكولاته مدمنين علي الشوكولاته الا انا مدمنة بطاطا ... بتصعب عليَّ البطاطا بتكون وحيدة ... عشان كده اي حاجة بلقيها وحيدة بميل عليها بخاف تحس بالوحدة اللي بحسها يمكن اقدر ابعد الوحدة دي ... لما كنت في مصر وابقي في مكان كله بيشجع الاهلي وانا اعده بشجع الزمالك مش بشجع الزمالك حباً في الزمالك لاء بس لاني بحس بوحدة مشجع الزمالك وهو اعد وسط اهلويه كانه بيدور في عيون الناس عن زملكاوي زايه فا بقوله انا هنا اهو بشد علي ايديك اهو.

واديني انا اعده علي الدكه مستنيه اللي يشد علي ايدية ويقولي انا هنا اهو انا عارف انك وحيدة دلوقتي طبعا المفروض افكر في ربنا لان دي الحقيقة لو فكرت في ربنا مش هاكون وحيدة لو اتذكرت وجوده هاعرف اني مش وحيدة ودا اللي اسعدني وابعد غمامة الحزن والغيرة عني ولو شوية ... بطبعي انسانة غيورة جداً بغير علي اي حاجة بحبها واي حد بحبه بمفرق ان كان حب ولا عشق ولا صديقة... لما اتصلت اليوم بواحده من صحباتي سألتها ان كانت تحب تاكل معايا ... مكنتش عايزة اكل لوحدي كان نفسي اروح البيت اطبخ وليمة مش اكل من باره زاي الراجل العزابي... لقتها بتقولي ان الزوجين اللي عرفتها عليهم عزموها هي وصحبتي التانية اللي انا كمان عرفتهم عليها مع بنات اتراك شاءت الظروف انهم يعرفوا البنات الاطراق دول عن طريقي بس بصورة غير مباشرة يعني ... ومحدش فيهم اتصل فيه ولا عزمني البنت من كتر الكسوف قالت لي انتي ممكن تيجي ... لا طبعا مش ممكن انا اتعودت اني مفرضش نفسي علي حد وبربط الناس من كلمهم معايا زاي ما بربط حالي بكلمة معاهم ... اعدت تقولي انا فكره انهم كلموكي لاء مكليمونيش ومن يوم الخميس وانا عارفه الموضوع دا ومحدش فيهم كلمني ولا قلي حاجة... وسكت بس غصب عني طبعي الغيور خلاني انسي ازاي بدات يومي بحاجات حلوة كتير.. 

زاي اني اليوم الصبح كنت مع صحبتي الانتيم آبي وان اصحابي في فلسطين كذبوا عليَّ عشان بس ميزعلونيش ... احساس رائع ان اصحابك يقولوا ليك لاء احنا بخير احنا كويسين برغم ان المستوطنين الاسرائلين هجموا عليهم وفي حد منهم في حالة خطيرة. 

غيرتي نستني لما "كاترينا" بنت جديدة اتعرفت عليها دخلت المخبز الساعة 10 الصبح جات بس تسلم عليه وتعد معايا شوية مكنتش عايزة تشتري حاجة لكن الروائح الحلوة جننتها خلتها راحت البيت جابت فلوس وجات ... قد ايه اللحظة دي كانت رائعة هي جات بس عشان تشوفني ... وقالت لي انها دورت عليَّ في الفيس وملقتنيش وعايزة تعرف ايه هو فيس بوكي ... كنت محتاجة لمسة حب زاي دي اللمسة دي من عند ربنا والحمد لله ... انا عارفه ان انا بعمل حاجات وحشة كتير تزعل ربنا لاني اكيد مش ملاك بس هو عارف ان انا كمان جوايه حد طيب وبيحاول يحارب ويجاهد عشان يكون احسن. 

اليوم في المخبز كان هادي لكن قبل انتهاء دوامي بقليل دخل زبون مش اول مره يجي بس اول مره يجي لوحده ... سألني عن الشغل واخباره واحواله ... وان انا كنت متجوزة ولا لاء وعينيه كانت باينه قوي هو بيبص فين ويتغزل فيه شوية ويديني فوق نفوخي شوية بيقولي انتي جميلة انتي رائعة انا مشوفتش واحده في جمالك قلت له شكراً دا من زوئك قلي لاء حقيقي انا شوفت حريم اشكال والوان لكن انتي مختلفه انتي طبيعية تلقائيه لاء حضرتك في مني كتير بس العين اللي تشوف... قالي لاء انتي شكلاً مش حلوة لكن روحك رائعة انتي رياضية ... قلت له انا فعلا كده رياضية ... انا مبفهمش حاجة في الكورة ولا بحضرها بس لما بحضرها بشجع بحرارة بصراحة ... قالي وكمان دمك خفيف وبعدين قالي انا بعد رمضان هاعزمك علي العشاء قلت له لاء شكرا الله يخليك قالي لاء انا مصمم قلت له لاء خلاص خليها فطار اصل انا ماما قالت لي مينفعش اطلع مع حد اكبر مني بكتير ولا اخد منه حاجة بص لي وقالي بتنكتي بالمصري؟ حاولت اتهرب لانه في الاول والاخر زبون وانا موظفة مقدرش اتصرف لحد ما صاحبة المكان تيجي ... كنت بحاول اكون مهذبه علي قد ما اقدر بس كل اللي كان جاي في بالي انا ايه مالي ومال العواجيز؟؟ مفيش شاب مره ينطس فيَّ كله كده فوق ال50؟ ايه للدرجة دي شكلي وحش وكبيرة في السن مثلا؟ 

روحت البيت بعد ما خلصت الشغل ... نمت نوم قاتل مش عارفه انا نمت لاني مرهقه ولا بسبب الغيرة ولا بسبب الهروب؟ بس نمت. 

الاعده علي الدكه قصاد البيت حلوة قوي مريحة قوي وبتخليني افتكر ملكوت الله ... والمشكلة مش فهمه ازاي بتأمل في خلق الله وانا بسمع لاقيتك والدنيا ليل ؟؟ 

غريبه انا صح؟