باي باي رمضان

شهر رمضان خلاص بيودع وبيقول باي باي ... بيقول باي باي علي كل حاجة ... استقبلت رمضان وانا مبتليه وبودعه وانا مبتليه كالعاده زاي كل سنة عادتي ولا هاشتريها؟؟

رمضان أثر جامد جدا علي المخبز وخلاني اشوف اللويبدة بصورة جديدة ...

في المخبز يوم اه ويوم لاء ... يوم في زباين وايام كتيرة لاء ... شيء لا يصدقه عقل علي رأي شويكار بصراحة قلت الزباين والفراغ اللي كنت فيه خلتني ابدعت في المخبز بطريقة رائعة بالنسبالي ... اختراعات عملت كميت اختراعات رهيبه واخر اختراعات الكورسوه .. انا فكره انا اول مره اكلت فيها كورسوه كان في مصر ... لما كنت باخد كورس الفرنساوي وقتها كان عندي عاده كل يوم الصبح اروح المعهد اعد في الكافيتيريا اللي ديكورها بسيط جدا مع الكورسوه والكابيتشينو كنت بحس اني في فرنسا وبالاخص شارع الشانزيليزه مازال حلمي باني ازور الشارع دا يراودني الناس كلها ... كلها كلها بتروح عشان البرج وانا عايزة اروح عشان الشارع... انتي غريبة قوي يا مهراجا.

الزباين اللي بيجوا زباين غريبة جدا ... يعني احنا مخبز وحد يجي يقولك هو انتم عندكم ايه حلو دايت؟ انا ساعتها ببص بصه غريبه لاء والادهش لما حد يجي يقولك انا عايز البسكوت بدون سكر بدون زبدة ازاي بقي؟؟ هو في بسكوت بدون سكر وبدون زبدة؟ طب ماشي في بسكر قليل طب اشيل الزبدة ازاي؟؟

بحكم شغلي انا بتعرض لكل حاجة ... من حروقات خارجية اللي ناس تحرقك من جوه ... يعني في زبون جلنا اول مره كان عادي اخد طلباته ومشي تاني مره اعد يسألني انا منين ؟؟ وان كنت بعرف لغات ولا لاء ؟ وان كنت مبسوطة في شغلي ولا لاء؟ ولحد دلوقتي دا كله عادي ... لكن بعد كده بدأت الاسئلة الشخصية ... انتي متجوزة مخطوبه مصاحبه؟؟ كان مفجأة انه سألني ان كنت عذراء ولا لاء؟ اختها بهزار ورديت عليه لاء انا برج الجدي لان انا مش عارفه هو انا لو هزقت امه هايصح ولا ميصحش ؟ حاولت اكون مهذبه علي قد ما اقدر ولاول مره احس بالبنات اللي بيشتغلوا في المحلات وبيبيعوا ... وبعدين هوب من تحت تقاطيق الارض لقيته بيقولي انا عايز اعزمك علي العشاء بعد رمضان؟ سألته بتهكم اشمعني بعد رمضان ؟؟ قالي عشان اكون برحتي ... رديت عليه لامؤخذه هو حضرتك عندك كام سنة؟ قالي انا شاب قلت له ماهو مبين اخرك يعني 60 وانا مش عايزة اقول 70 عشان مجرحكش يعني بس انا 27 اكيد انت بالنسبالي جيدو ... انا وقتها مبقتش عارفه انا بقول الكلام دا ازاي؟ بس انقذني من الموقف دا لما المديرة جات وقتها حاسيت ان ربنا بعتها ليَّ مبقتش عارفه احكلها الموقف ... اقول ليها هو قالي ايه ولا مقولش؟ وبصراحه مقولتش مش هينفع كل شوية اقول لها دا عاكسني ودا بصبصلي واتصرف ازاي؟

الاشاكل دي مبتخلصش ونوعية "كال هال" كتير ... زبون جيه مرتين اعد يسألني عن المحل ومن ردي عليه بالانجليزي لان كلامنا كان انجليزي وكان باين انه مش اردني او من ملامحه انه مش عربيه اصلا بس كان في حاجة مريبه الحس الصحفي الجاسوسي اللي جوايه اشتغل بالاخص لما سألني ان كنت مصرية ولا لا؟ من طريقة نطقي ل the  طبعا قالي انه راح مصر وراح شرم الشيخ وقتها أصبحت افكر في الجيران والعدو ... قد يكون جار يهودي وقد يكون عدو صهيوني ... وبدأت الحسه السادسة اللي عندي تشتغل ... سألني عن حاجات كتيرة عن اهلي وعن الشغل وعن حياتي في مصر وكل المعلومات اللي اديته اياها كانت مزيفه لاني مش مرتاحة ... وهو خارج من المحل قالي انا حمدان حمدين ولا حمدين حمدان ودا نيك نيم ولي نيك نيم اخر كال هال وقالي انه عنده نيك نيمز كتيره قوي .

خرج وهو عامل فاتوره كبيرة ... لكن خلاني اعيش مشهد من مسلسل جاسوسي مصري وبدات اتخيل نفسي والعدو الصهيوني بيحاول يجندني والمخبارات المصرية تقفشني وابقي عميل مزدوج وادي العدو معلومات مغلوطة عشان عروبتي فجأة تنقح عليه ... مش قدره انسي لما اعد يقولي ان الملك عبد الله لازم يكون في سلام مع اسرائيل ... احنا معندنا مشكلة معاهم كا جنسيه او ديانه لكن عندنا مشكلة معاهم كا ساسية ودماغ صهيونيه هناك فرق كبير قوي ... هما فكرنا اغبيه ومش فهمين في وقت ان هما اللي اغبيه ومش فاهمين احنا بنتكلم عن ايه؟ فاكرين ان احنا بنكرهم لكن احنا مش بنكره اليهود احنا ضد الصهيونيه والنازيه والاخوان المسلمين وداعش.

انا في المخبز في اليوم الواحد بمر بكل حاجة الحالات الدينية زاي زبونه كده جات وهي مسيحية متدينه جدا اعدت تصلي في المحل لينا وللمديرة بتاعتي عشان ربنا يفتحها في وشنا ويرزقنا كتير ... في وقت ما هي كانت بتصلي وخلصت صلاة وانا من جوايه مش عارفه انا مبهوره ولا مصدومه ولا ايه؟ يدخل واحد مسلم بكرش يسألني هو المحل دا لمين؟ واول ما تقول لواحده اجنبيه بيكون السؤال التالي هل هي مسيحية ام يهودية ولما بقول معرفش ... يقولي طيب هي بتأيد اسرائيل ولا لا؟ بقيت بسأل نفسي هو دا ليه بيحصل معايا انا؟ في وجودي انا ؟ هو ليه مبيحصلش مع المديرة او المدير؟؟ ليه يعني ولا هو انا الدراما ورايا ورايا ؟؟

البقشيش في المخبز ممنوع وفي ناس كيوت بتصمم انها تسيب لي بقشيش بحطه في الكاش ودايما المدير يسألني في فلوس زيادة جات منين؟ بتكسف اقوله ان دا بقشيش وان عيني فيه بصراحة يعني اوقات لما بشوف الناس بتحط القروش في صندوق الخاص بجمعية الحيوانات دي ... بقول لنفسي طب ليه ميعملوش واحد للبني ادمين؟ دا في ناس كتيرة ممكن تستفاد من الموضوع دا وقد اكون انا اولهم يعني.

كل يوم بشوف امثال كتيرة ... واحده بقلب محطم وعايزة شوكولاته ... واحد زهقان ومش عارف يعمل ايه خطف رجله عشان يشوف عندنا ايه ويضيع وقته.. ازواج بيجوا لو تشوف طريقة كلامهم تعرف يعني ايه زوجين .. لاء وكله كوم ولما حد يجي بقي يسألك هو الاكل دا فيه جيلاتين؟؟ صدقوني يا جدعان الجيلاتين اللي عندنا غير اللي عندكم في اوروبا الجيلاتين بتعنا دا حلال للمسلمين واليهود وللنباتين.

انا كمان بكون صدقات من المخبز اتعرفت عن طريق المخبز علي بنتين احلي من بعض في فتره قصيرة بقوا قريبات مني جدا ... كل كام يوم بيجوا يزوروني .

اكتر حاجة بحب اعملها البيسكوتي ... والابل اشترودل ... السينمون رولز... في حاجات بحب اعملها كل يوم ومزهقش منها لكن دول علي القمة.

اللويبدة غير الرابية خالص ... انا عايشة في مكان وبشتغل في مكان تاني ... اللويبدة مليانه من كل لون زاي اللي بشوفه في الشغل بس علي اوسع بالاخص وجمب بيتي كافيه.

اصبح اصحابي المثلين شيء مهم من يومي اول ما بروح الساعة 7 ونص دي لازم ادخل الكافية اولا اشوف هما فين اسلم علي كل واحد فيهم واسألهم كالعادة اطبخ ايه؟ واعمل ايه؟ وبنيجي وبنتعشا كلنا عندي في البيت ... بحب اللمه دي بحب ان الكل ياكل من اكلي وان الكل يكون معايا وحوالين مني ..

من السهل تبقي جزء من حاجة لو انت حاسس انك وحيد لان الكل في اللويبدة بسهوله بتيكلموا معاك هنا الكافيهات بتفتح من بدري حتي في رمضان من الساعة 11 ونص وعادي انا لما بدخل عشان استعمل النت بلاقي ناس كتيرة هنا وكان دا مش رمضان واكترهم عرب ... اللي بلاقيه مضحك ان الناس وهي بتصوم بتحمل ربنا جميلة الصيام والناس في الكافية بتشير اللي نفسها بالوضوح ولكن ازاي وضوح انكم مش صايمين ومش مهتمين؟ قصاد اصحابكم ولكن لما بترجعوا البيت بتمثلوا انكم صايمين ودا نفاق .. لحد ماحد سألني ايهم احسن وفي رأي ولا واحد فيهم احسن من التاني.

هنا كل واحد واخد راحته تعاكس براحتك وتبقي محترم برحتك تبقي سكري برحتك وتبقي محتشم وواعي براحتك ... اللويبدة المكان الوحيد اللي لقيت نفسي فيه مكان ملئ بالتناقضات زاي حياتي مكان مجنون زاي حياتي ... مكان غريب زاي حياتي.

دوار بريس مش مجرد دوار دوار في الصبح لكبار السن وللاجانب بعد الظهر وفي المساء للعائلات السورية ..

اللويبدة هنا مليانه ناس ومن وسط الناس دي انا وكارلي اللي ساكنه معايا من فتره اتفقنا خلاص هنعمل جدول للتنظيف واهو يوم نعمل منه وعشرة لاء ... بس محدش قال ان زيد يدخل جوه الجدول ... زيد دا صديقي الصدوق دلوقتي واخويا ... الذكر اللي بتحاج انه يكون موجود كانه عائلتي ... بحس اني اقدر اعتمد عليه اللي حد ما ... من كان يوم انا وزيد كنا بنطارد الصراصير في البيت وطول الليل لحد 4 الفجر مش بنعمل حاجة غير اني اصوت واقوله اهو اهو وهو ماشك الشبشب وبيجري وراهم ... الذ شيء لما افتكر الصرصار فار من كتر مكان بيخربش في كيس الفحم ... الصراصير في الاردن غير مصر ... هنا الاحجام جامبو يابا.

زيد من الناس اللي بتعرف تضحكني جدا بنسي معاه هموم كتيره اخوه واولاد اخوه اخدوا مكانه كبيرة جدا في قلبي كانهم عائلتي الصغيرة.

اللويبدة المكان اللي بحب اخرج واتفسح واسترخي فيه ... هي بيتي بالضبط ...

الشهر دا احتفلنا بعيد ميلاد كارلي طبعا بدري عن يوم عيد ميلادها والهدايا كلها جات ليها بدري بدري لانها كانت مخططه تروح لبنان لكن لا راحت لبنان ولا نيلة ووقتها زعلت انا عليها كل شيء جلها بدري عشان قالت انا بس هاروح ...

طبعا زاي ما قلت رمضان بيودع ... واخيرا عرفت ان انا هاخد اجازة يومين مش عارفه اعمل فيهم ايه؟ اروح رحله ولا اروح العقبه؟ ولا البحر الميت ولا اقضيهم في البيت بصراحة انا لو اخر حاجة دي حصلت هاطق ... انا مصدقت اني اخد اجازة اصييييع فيها اضييييع فيها ... اجازة اعمل فيها زاي سعاد حسني وهي بتقول قولي يا هذا لماذا اخدنا اجازة؟

الكلام مبيخلصش لكن الوقت بيخلص انا لازم اروح دلوقتي ... لكن اكيد هرجع تاني ليكم.